బాబీ దర్శకత్వంలో మెగాస్టార్ చిరంజీవి – శృతిహాసన్ జంటగా నటించిన తాజా చిత్రం వాల్తేరు వీరయ్య. ఈ చిత్రంలో మాస్ మహారాజా రవితేజ ఓ కీలక పాత్ర పోషిస్తున్నారు. ఈ మూవీకి మ్యూజిక్ డైరెక్టర్ దేవిశ్రీప్రసాద్ అందించిన సంగీతం మెగా అభిమానులను ఆకట్టుకుంటుంది. అలాగే శేఖర్ మాస్టర్ కంపోజ్ చేసిన స్టెప్పులు అభిమానులతో డ్యాన్స్ వేయిస్తున్నాయి.
ఈ చిత్రం జనవరి 13న సంక్రాంతి కానుకగా థియేటర్లలోకి రానుంది. దీంతో ఇప్పటికే ఈ సినిమా నుంచి నాలుగు పాటలు విడుదల చేశారు. ఇందులో ఒకటి ఐటెం సాంగ్, మరో పాట డ్యూయెట్, ఓ టైటిల్ సాంగ్, పూనకాలు అంటూ మరో పాటని కూడా విడుదల చేశారు. అయితే ఈ చిత్రంలోని డ్యూయెట్ సాంగ్ ” నువ్వు శ్రీదేవి అయితే.. నేను చిరంజీవి అవుతా” అంటూ మెగాస్టార్ – శృతిహాసన్ పై మంచు కొండలలో ఈ పాటని షూట్ చేసిన విషయం తెలిసిందే.
గతంలో ఈ సాంగ్ గురించి మెగాస్టార్ లీక్ కూడా ఇచ్చారు. ఈ పాటని ఫ్రాన్స్ లోని మంచు కొండల్లో చిత్రీకరించారు. మైనస్ 8 డిగ్రీల ఉష్ణోగ్రత గురించి చెప్పుకొచ్చారు మెగాస్టార్. అయితే ఇప్పుడు ఇదే పాట గురించి ఓ ఇంట్రెస్టింగ్ న్యూస్ పంచుకుంది శృతిహాసన్. ఈ సాంగ్ షూటింగ్ సమయంలో మైనస్ డిగ్రీల చలి ఉందని తెలిపింది.
ఈ పాట కోసం చీరలో ఆ వాతావరణం లో డాన్స్ చేయడం తనకు ఇబ్బందిగా అనిపించిందని చెప్పుకొచ్చింది. అయినప్పటికీ అభిమానుల కోసం చేయాల్సిందేనని తెలిపింది. ఆ మంచులో మరో పాట కోసం డాన్స్ చేయనవసరం లేదనుకున్నానని.. ఎందుకంటే ఆ వాతావరణం లో ఎంతో అసౌకర్యంగా ఫీల్ అయ్యానని తెలిపింది శృతిహాసన్. ఇదిలా ఉంటే.. మరోవైపు శృతిహాసన్ పాన్ ఇండియా స్టార్ ప్రభాస్ నటించిన సలార్ చిత్రంతో పాటు, నందమూరి బాలకృష్ణ వీరసింహారెడ్డి చిత్రంలో కూడా నటిస్తున్న విషయం తెలిసిందే.