డార్లింగ్ ప్రభాస్ ఫ్యాన్స్ ఎప్పుడెప్పుడా అని ఎదురుచూస్తున్న సినిమాల్లో ప్రాజెక్ట్ కె ఒకటి. వైజయంతి మూవీస్ పతాకం పై ప్రముఖ నిర్మాత అశ్విని దత్ రూ. 500 కోట్ల భారీ బడ్జెట్ తో ఈ సినిమాను తెరకెక్కిస్తున్నారు. దర్శకుడు నాగ్ అశ్విన్ ఈ చిత్రాన్ని ప్రతిష్టాత్మకంగా రూపొందిస్తున్నారు. ఇప్పటికే షూటింగ్ ప్రారంభమైన ఈ చిత్రం నుండి రోజుకు ఒక వార్త బయటకు వస్తుంది. కాగా సైన్స్ ఫిక్షన్ నేపథ్యంలో వస్తున్న ఈ చిత్రంపై ప్రభాస్ ఫ్యాన్స్ తో పాటు సినీ ప్రేమికులు కూడా భారీ అంచనాలు పెట్టుకున్నారు.
ఈ సినిమాను డైరెక్టర్ నాగ్ అశ్విన్ పక్కా ప్రణాళికతో తెరకెక్కిస్తున్నారు. ప్రపంచ వ్యాప్తంగా అభిమానులు కోరుకునే విధంగా ఈ సినిమా ఉండబోతుందని తెలుస్తుంది. అందుకే ఈ సినిమాలో నటీనటుల ఎంపిక విషయంలో కూడా దర్శకుడు నాగ్ అశ్విన్ చాలా జాగ్రత్తలు తీసుకున్నట్లు టాక్ వినిపిస్తుంది. ఇప్పటికే ఈ చిత్రంలో బిగ్ బి కీలక పాత్ర చేస్తుండగా, బాలీవుడ్ అగ్ర నటి దీపికా పదుకొనె హీరోయిన్ గా నటిస్తుంది.
అయితే ప్రస్తుతం ఈ చిత్రానికి సంబంధించి ఒక ఇంట్రెస్టింగ్ వార్త తెగ వైరల్ అవుతుంది. ఈ చిత్రంలో పాన్ ఇండియా హీరో ప్రభాస్ తో పాటు సూపర్ స్టార్ మహేష్ బాబు, కోలీవుడ్ స్టార్ హీరో సూర్య, మలయాళ స్టార్ దుల్కర్ సల్మాన్ నటిస్తున్నట్లు సమాచారం అందుతుంది. అన్ని భాషల నుండి హీరోలు ఈ చిత్రంలో ఉంటే సినిమాపై అంచనాలు పెరుగుతాయని చిత్ర యూనిట్ భావించినట్లు తెలుస్తుంది. అందుకే ఇతర భాషల్లో ఉన్న స్టార్ నటీ నటులను ప్రాజెక్ట్ కె కు ఎంపిక చేశారని టాక్ వినిపిస్తుంది. అయితే దీనిపై అధికారిక ప్రకటన ఇప్పటి వరకు రాలేదు.