తెలుగు ప్రేక్షకులకు పరిచయం అవసరంలేని నటి మంచు లక్ష్మి. కలెక్షన్ కింగ్ మోహన్ బాబు కుమార్తెగా ఇండస్ట్రీకి పరిచయమైనప్పటికీ అనతి కాలంలోనే తనకంటూ ఓ ప్రత్యేక గుర్తింపును సంపాదించుకుంది. ఇక టాలీవుడ్ ఇండస్ట్రీలో ఎక్కువగా ట్రోల్స్ కు గురయ్యే ఫ్యామిలీ ఎవరైనా ఉన్నారంటే అది మంచు ఫ్యామిలీ అనే చెప్పాలి. అయితే తాజాగా ఓ ఇంటర్వ్యూలో పాల్గొన్న ఆమె సోషల్ మీడియాలో తనపై వచ్చే కామెంట్స్ పై స్పందించింది.
“నేను మాట్లాడే విధానం పై చాలా మంది విమర్శలు చేస్తూ ఉంటారు. వాళ్లు నాలా ఉండలేరు కాబట్టే నన్ను అవహేళన చేస్తున్నారు. ఇంట్లో కూర్చుని ఏ పని పాట లేకుండా కామెంట్ చేసే వాళ్ళని నేను పట్టించుకోను. ఈ భూమి మీద మనిషిగా పుట్టడం చాలా గొప్ప విషయం. నేను పుట్టినందుకు ఏదైనా గొప్పగా చేయాలనుకుంటున్నాను. అందుకు అనుగుణంగానే ఒక నటిగా విభిన్నమైన పాత్రలు ఎంచుకుంటున్నాను. ఇప్పుడు అందరూ నాలాగే మాట్లాడుతున్నారు” అంటూ చెప్పుకొచ్చింది.
అలాగే “ప్రతి ఇంట్లోనూ ఓ మంచు లక్ష్మీ ఉంది. మా కుటుంబానికి సంబంధించిన విషయాలను మేము ప్రైవేట్ గానే ఉంచుతాము. సమయం వచ్చినప్పుడు మేమంతా ఒక్కటిగా కనిపిస్తాం. నాకు మనోజ్ కి మధ్య విభేదాలు ఉన్నాయని ప్రచారం చేస్తున్నారు. ఈ ప్రచారంలో నిజం లేదు. మేము తరచూ కలుస్తూ ఉంటాం. మా ఇద్దరి కంటే విష్ణు విభిన్నమైన వ్యక్తి. విష్ణు ఎక్కువగా వర్క్, పిల్లలపైనే ఫోకస్ పెడతాడు. అందువల్లే మేము ముగ్గురం కలిసి ఎక్కువగా కనిపించం” అని చెప్పుకొచ్చింది మంచు లక్ష్మి.