పవన్ కళ్యాణ్-సాయి ధరమ్ తేజ్ కాంబినేషన్ లో ‘వినోదయ సీతమ్’ రీమేక్ కానున్న సంగతి తెలిసిందే. ఈ చిత్రం ఈ మధ్యనే పూజా కార్యక్రమాలతో ప్రారంభమైంది. ‘పీపుల్ మీడియా ఫ్యాక్టరీ’ బ్యానర్ పై టి.జి.విశ్వప్రసాద్ ఈ చిత్రాన్ని నిర్మించనున్నారు. సముథ్రఖని ఈ చిత్రానికి దర్శకత్వం వహించబోతున్నారు. తెలుగు ప్రేక్షకుల అభిరుచికి అనుకూలంగా త్రివిక్రమ్ స్క్రిప్ట్ రెడీ చేశారు. ఈ చిత్రంలో టైం కు రూపం ఉంటే ఎలా ఉంటుందో అలాంటి పాత్రను పవన్ కళ్యాణ్ చేస్తున్నట్టు భోగట్టా. కథ ఆధారంగా ఈ సినిమాలో పవన్ కు హీరోయిన్ ఉండదు. కానీ, సాయి ధరమ్ తేజ్ పాత్రకు మాత్రమే హీరోయిన్ ఉంటుంది. అందుకోసం మొదట ‘రొమాంటిక్’ బ్యూటీ కేతిక శర్మను ఎంపిక చేసుకున్నారు.
కానీ, తాజాగా ఈ హీరోయిన్ ను తప్పించి ‘భీమ్లా నాయక్’ లో రానా భార్యగా నటించిన సంయుక్త మీనన్ ను ఎంపిక చేసుకున్నట్టు టాక్ నడుస్తుంది. కేతిక స్థానంలో సంయుక్తను తీసుకోవాలని త్రివిక్రమ్ సూచించాడట. ఈ మాటల మాంత్రికుడి సూచన మేరకే, సంయుక్తను హీరోయిన్ గా ఎంపిక చేసినట్టు ఇండస్ట్రీ వర్గాల్లో గుస గుసలు వినిపిస్తున్నాయి. ఈ సినిమాకు త్రివిక్రమ్ స్క్రిప్ట్ ను రెడీ చేయడంతో పాటు సహా నిర్మాతగా కూడా ఉంటున్నాడు.
ఈ మధ్య కాలంలో పవన్ చేస్తున్న సినిమాల విషయంలో తెర వెనుక నుండి త్రివిక్రమ్ పాత్ర ఎక్కువగా ఉంటుందనే టాక్ ఇండస్ట్రీలో రోజు రోజుకీ ఎక్కువవుతుంది. తాజాగా కేతిక, సంయుక్త విషయంలో అది మరోసారి నిజమయ్యేలా ఉంది.